Ribeira contará coa primeira aula formativa de España centrada en pesca sustentábel

Ribeira vai contar coa que será a primeira aula formativa de España sobre pesca sustentábel. Así o fixo saber este venres 27 de maio a conselleira do Mar, Rosa Quintana, durante unha visita ao edificio que albergará a dita aula: a Escola Oficial Náutico-Pesqueira de Ribeira. Quintana explicou que “se trata dun novo contido formativo que pretende chegar a todos os niveis educativos da escola e que abarcará todo o proceso de captura dos recursos, desde a saída de porto das embarcacións ata o seu regreso a terra”.

Rosa Quintana, participará na xornada Pesca Saúde, organizada pola Federación Española de Sociedades de Nutrición, Alimentación e Dietética con motivo do Día Nacional da Nutrición.

Rosa Quintana detallou que esta aula está en proceso de deseño e dotación para “tela operativa canto antes” e que disporá de cinco seccións para cubrir todos os eidos que teñen que ver coa actividade extractiva. A primeira delas é a de Tecnoloxía de materiais e pesca selectiva, que inclúe as prácticas de armado, lanzamento, mantemento e reparación de artes e aparellos e a solicitude de licencias, entre outras temáticas. A segunda céntrase nas Tarefas de teledetección e ecodetección dos recursos, vía novas tecnoloxías, satélite, sonar, ondas e ecoondas, e a terceira no Proceso de pesca sustentábel e resopnsábel. A cuarta aborda o Proceso de conservación, para asegurar a calidade das capturas, o movemento do recurso aos puntos de control en terra e o proceso de conxelación e ultraconxelado a bordo.

A última desas seccións ten relación coa Co-gobernanza e xestión responsábel da actividade, un eido no que se formará ao alumnado na importancia do compromiso cos distintos axentes pesqueiros, do diálogo e da colaboración coas distintas administracións para “un desenvolvemento axeitado da extracción dos distintos recursos”.

A titular de Mar salientou que “a creación desta aula contribuirá a que o conxunto do sector marítimo-pesqueiro galego avance neste eido e a que a comunidade manteña o seu papel como referente en prácticas sustentábeis demostrando, tanto ante as institucións europeas como internacionais, o seu compromiso coa protección dos recursos e a conservación do medio ambiente”.

A visita ás instalacións da Escola Oficial Náutico-Pesqueira de Ribeira coincidiu coa participación da conselleira por vídeo-conferencia na xornada Pesca Saúde, organizada pola Federación Española de Sociedades de Nutrición, Alimentación e Dietética (FESNAD) no marco da celebración do Día Nacional da Nutrición. Rosa Quintana salientou na súa intervención a relevancia de que toda a poboación inclúa os produtos do mar como un elemento básico da súa dieta e puxo de relevo “o labor realizado pola Xunta desde o ano 2009 para promover o seu consumo facendo especial fincapé nos máis pequenos e na xente nova”.

A titular de Mar agradeceu o traballo realizado pola Fundación Dieta Atlántica e pola presidenta do seu comité científico, Rosaura Leis, na divulgación entre a cidadanía dos beneficios para a saúde de consumir peixes e mariscos. Ese agradecemento tamén o fixo extensíbel ao Concello de Ribeira e ao seu alcalde, Manuel Ruiz, “por colaborar coa Consellería do Mar na organización de distintos eventos neste eido e polo seu apoio constante ao sector marítimo-pesqueiro local”.