O Mes das Letras en Rianxo virá cargadiño de actividades, segundo confirmou a Área de Cultura do Concello. Comezaron o 6 de maio coa presentación da curtametraxe Rompente de Eloy Domínguez Serén no Auditorio Municipal, e tiveron continuidade un día despois, coa homenaxe ao poeta local Brea Segade e coa presentación de tres libros de poemas de Ricardo Seixo Fernández (Sinais, Coa Luz Negada e Na República da Intimidade), tamén no Auditorio rianxeiro.
Este venres 13 a axenda experimentará un novo repunte coa representación da peza teatral Continente María, de Ainé Producións, na Sala Arcos Moldes do Auditorio. Será ás 21.00 horas e terá unha duración aproximada de 75 minutos. A función conta co apoio de A Quinta do Cuadrante, o Concello da Coruña e o Centro Dramático Galego. A obra en cuestión, abeirada ao programa de residencias artísticas do Concello de Rianxo (o equipo responsábel da función leva varias semanas facendo uso da devandita sala do Auditorio Municipal para a preparación desta nova produción), é unha homenaxe á actriz galega María Casares, da cal se está a celebrar o centenario do seu nacemento. Partindo do seu estudo e dun intenso traballo documental sobre a súa vida e as súas circunstancias, a compañía teatral argallou un espectáculo que é “un achegamento á nosa historia recente dun xeito reflexivo, dinámico, vitalista e crítico”, sinalan, engadindo que Continente María constitúe un tributo á figura de Casares desde a terra que a viu nacer, utilizando o mesmo medio que ela decidiu habitar até os seus últimos días: o teatro.
A axenda prosegue o sábado 14, no mesmo escenario, co espectáculo Máis Alálá, argallado por Xelís de Toro e Alejandro Vargas. Será a partir das 21.00 horas. Máis Alálá é un proxecto poético sonoro performático inspirado no libro De catro a catro de Manoel Antonio, creado polo músico Alejandro Vargas (Cuba/Galicia) e o escritor e performer Xelís de Toro (Galicia/Reino Unido). O título é unha recreación do título do manifesto literario Máis Alá que Manoel Antonio realizou xunto con Álvaro Cebreiro no ano 1922. Partindo dos 19 poemas do libro De catro a catro os artistas crean, nas súas palabras, “un sinxelo programa informático para transpoñer todas as letras dos poemas a números e posteriormente a notas musicais”. Isto permítelles traballar cun banco de palabras e un banco de notas musicais.
A axenda complétase coas seguintes citas:
– Festa do Bandullo, o 14 de maio no Araño
– Celebración da Virxe dos desamparados, o 14 de maio en Brión (Leiro)
– Feira de 1906, o 17 de maio en Campo de Pasos (Taragoña)
A maiores de todo o devandito, Rianxo tamén vai dar acollida a dous concertos de tributo ao compositor galego Carlos García López-Picos (Betanzos, 1922–Oleiros, 2009), do que se están a celebrar estes días o centenario do seu nacemento. Estes concertos, que veñen da man do departamento de Cultura da Deputación da Coruña, arrincaron o 29 de abril no Pazo de Mariñán e está previsto que este maio o ciclo de actuacións percorra diversos escenarios da provincia. No caso de Rianxo, recalarán no Auditorio os días 20 e 21 de maio.
O primeiro concerto, o do 20 de maio, será ás 21.00 h e é unha actuación para violonchelo e piano que contará coa presenza da violonchelista Teresa Morales Diego e o pianista Javier Ares Espiño, que interpretarán partituras de Manuel de Falla, García-Picos, Isidro B. Maiztegui e Astor Piazolla.
O do 21 de maio, ás 21.00 h, será unha actuación para voz e piano coa soprano Susana de Lorenzo e o pianista Alejo de Lorenzo, que ofrecerán a súa versión de obras de obras de Marcial del Adalid Gurrea, Eugenia Osterberger Luard, Andrés Gaos Berea, García-Picos e Juan Durán Alonso.
