O Concello de Boiro instalou unha estrutura cuberta tipo pérgola no acceso aos campos de fútbol de Vista Alegre. O alcalde, José Ramón Romero, e a concelleira de Deportes, Dores Torrado, visitaron este martes 3 de maio as instalacións para coñecer o resultado das actuacións. O obxectivo deste novo equipamento foi “crear unha estrutura que servise de acubillo para as inclemencias meteorolóxicas”, sinalaron. Para iso, colocouse unha cuberta de 5 metros de ancho por 20 de longo para abrigar a zona de entrada como o espazo de tránsito entre os dous campos de fútbol cunha cuberta de policarbonato e con protección solar.
O orzamento das obras que se veñen de executar ascende a 48.329,78 euros.
Segundo confirmaron Romero e Torrado, as instalacións de Vista Alegre son as máis empregadas e nelas celébranse acotío adestramentos das categorías inferiores da EFM, competicións durante a fin de semana, partidos de veteranos e adestramentos do Boiro sénior e o equipo feminino.“Con esta actuación damos resposta a unha demanda das persoas usuarias das instalacións para a protección das inclemencias meteorolóxicas no momento de entrada e saída dos rapaces e rapazas”, afirmou o alcalde. O Concello de Boiro traballa na mellora e acondicionamento das instalacións deportivas do municipio xa que “é fundamental para a práctica deportiva contar con equipamentos axeitados”.