O BNG incorpora ao Plan de Mobilidade Sustentábel de Ribeira as súas propostas a prol do transporte público, a accesibilidade e o medio ambiente

23 Maio 2022

O Bloque Nacionalista Galego de Ribeira informou da aprobación das alegacións presentadas polo grupo ao Plan de Mobilidade Sustentábel de Ribeira, o PMUS. A agrupación, que valorou moi positivamente esta incorporación logo da exposición pública do plan por parte do Concello, emitiu un comunicado no que salienta o fortalecemento do PMUS a prol dos “espazos públicos de calidade, accesíbeis, seguros, con usos plurais para uso e desfrute da veciñanza”, elementos que forman parte “da visión dos nacionalistas”, recoñecen. O obxectivo do BNG era imprimir no plan “unhas modificacións profundas na mobilidade e na conformación da trama urbana do centro de Ribeira pero tamén das súas parroquias”.

O portavoz do BNG, Luís Pérez Barral, detallou que as propostas presentadas centráronse na mellora da mobilidade priorizando o tránsito peonil, os medios de transporte públicos e os non contaminantes, en garantir a accesibilidade universal e en aumentar a seguranza viaria e os estacionamentos. Ademais do anterior, Pérez Barral reitera “a necesidade de rematar coa política de asfalto e cemento que promove o Partido Popular e aposta pola creación de novos espazos peonís, zonas verdes así como facer máis esforzos para mellorar a seguridade viaria e adaptar as vías para que respondan ás necesidades reais da forma máis segura posíbel”.

En materia de accesibilidade os nacionalistas pedían “acabar cos problemas que existen por todo o municipio por mor dos anchos de beirarrúa insuficientes, cruzamentos sen adaptar, postes mal situados, bordos demasiado elevados, elementos de mobiliario que invaden o itinerario peonil, etc”, explican no seu comunicado deste luns 23 de maio, engadindo que se promoveu a inclusión no PMUS de medidas que priorizasen a plataforma única en todas as reformas que se fagan nas rúas e “a creación dunha guía con criterios básicos que garantan a accesibilidade universal”.

Con respecto ao transporte público o grupo explica que “coas alegacións incluídas velarase polo cumprimento dos horarios, habilitarase o transbordo que evite o pago de dous billetes entre as persoas que viaxan entre parroquias, sinalizaranse as paradas e os horarios e promoverase a creación de tarifas reducidas para persoas desempregadas, xubiladas e con mobilidade reducida”.

No tocante a outros medios de transporte o BNG sinala que foi quen de “arrincar o compromiso para que Ribeira demande a elaboración de senllos estudos sobre a viabilidade de crear unha conexión ferroviaria así como un estudo de beneficios e custos de establecer unha conexión marítima entre as dúas bandas da ría de Arousa”.

Por último incorporáronse medidas para mellorar a seguridade dos pasos de peóns máis transitados e o calmado de tráfico nas estradas con beirarrúas estreitas ou preto dos contornos escolares.

A única alegación que o Goberno local rexeitou foi recuperar a xestión directa do aparcadoiro do Centenario para reducir as súas tarifas e habilitar bonos de desconto.

Outros artigos

Denunciada unha onda de roubos no centro de Ribeira

Veciños de varias rúas do centro de Ribeira denuncian que nos últimos días producíronse varios roubos en coches, así como pequenos furtos que sementaron a inseguridade nesta zona. Unha das vítimas foi o propietario dun turismo ao que lle rebentaron unha lúa da parte...

+

Publicidade

Revista en papel

Opinión

“Reto astrolabio”. Alberto Barciela

“Reto astrolabio”. Alberto Barciela

El mar merece respeto, aun así reclama y admite audacias, quizás motivadas por el horizonte casi infinito. El ser humano, en la búsqueda de sí mismo, de completar inquietudes y afanes, de responder a su curiosidad, acepta con gusto el reto de los nuevos rumbos,...

“Paz e despois gloria”. Luís Celeiro

“Paz e despois gloria”. Luís Celeiro

Eles tamén ganaron, aínda que desta vez, como noutras ocasións, houbo perdedoresagochados detrás do parapeto da verborrea ou dese inmenso muro de silencio. Taménhoubo quen, con tristura e desacougo, admitiu a derrota e parece que está en disposiciónde intentalo...