| Despois das xornadas divulgativas celebradas en Valga e Rianxo, o sábado 28 de maio terá lugar, no Pazo de Goiáns (Boiro), un Túnel do viño das Indicacións Xeográficas Protexidas (IXP) de Galicia, que nesta ocasión terán como protagonista a IXP Barbanza-Iria. Ao longo do día terán lugar un acto institucional de apoio aos viños das IXP e catas comentadas para profesionais e público xeral, nas que estarán presentes adegas de toda Galicia. |
| No acto institucional está prevista a lectura dunha declaración institucional, a través da que se busca o compromiso das entidades locais cos viños das Indicacións Xeográficas Protexidas para a promoción dos seus viños, o fomento do seu consumo e o reforzo do sector vitícola no territorio. Participarán os alcaldes de Boiro, Rianxo, A Pobra do Caramiñal, Dodro, representantes institucionais dos concellos de Valga, Pontecesures, Catoira, Portas, Ribadumia, Ribeira e outros concellos que forman parte da IXP Barbanza-Iria e comarcas limítrofes, adegueiros de toda Galicia, o presidente da Asociación de Empresarios de Ribeira, a presidenta da asociación Ambar, e representantes dos Grupos de Desenvolvemento Rural Deloa e Salnés-Ulla-Umia, así como dos outros GDR que participan no proxecto. |
| Pola tarde, no túnel do viño poderanse coñecer e probar viños das catro IXP de viño de Galicia a través e catas comentadas que se celebrarán ao longo do día, poñendo o foco nos da IXP Terra de Barbanza-Iria. PROGRAMA 12:00 Visita ao Pazo de Goiáns e á mostra dos viños das IXP 12:30 Acto institucional de apoio e promoción dos viños das IXP 17:00 Catas de viño comentadas para profesionais 18:30 Catas de viño comentadas abertas ao público |
