As contribucións ao gravado de Eugenio Granel, a partir do 27 no Museo de Artes

O Museo do Gravado de Artes (Ribeira) vai inaugurar o vindeiro 27 de maio unha nova exposición. Trátase da mostra Azares de Granell en zinc e papel. A inauguración será o vindeiro venres ás 12.30 horas na sala 2 do Museo do Gravado.

A mostra Azares de Granell en zinc e papel vén da man da Fundación Eugenio Granell, con sede en Santiago, e supón un achegamento ás contribucións ao gravado dun dos grandes representantes do surrealismo: o galego Eugenio Granell. En palabras da fundación, “Eugenio Granell foi un observador incansábel da riqueza creativa do mundo que o rodeaba e mostraba gran interese pola estética do gravado e o seu proceso creativo, proxectándoo nos seus estudos, nas súas clases, na súa biblioteca e nas colaboracións puntuais para edicións especiais de libros”.

Destacan das súas contribucións as súas augafortes e serigrafías para as edicións de: Les Iles Fortunées, La Kábala, Menú, etc. Son salientábeis tamén as súas colaboracións cos estampadores Anelys Boza, María Muñoz, Pedro Arribas, Xurxo Fabeiro e as galerías EEGEE-3, La Kábala, Citania que souberon extraer o mellor da esencia de cada idea.