Noia continua esta fin de semana coas actividades do Maio das Letras. O sábado o Coliseo Noela acollerá partir das 20:30 horas terá lugar a peza teatral Dreaming Juliet, de Elefante Elegante, que ten as prazas dispoñíbeis en Ataquilla.com. O espectáculo é a nova creación para público adulto da dita compañía, unha función inspirada en Romeo e Xulieta de W. Shakespeare e na que se aborda a cuestión máis esencial da existencia humana: o amor. A dirección vén da man de María Torres, Gonçalo Guerreiro e Pablo Sánchez. O elenco está formado por María Torres, Gonçalo Guerreiro. Marta Alonso, Nacho Martín e Mighelón Paz.
O domingo 15 ás 20:00 horas, será a quenda de Taburete en acústico. Tamén se poden adquirir as entradas a través de Ataquilla.com. O concerto está organizado polo Concello en colaboración coa Cadena Ser e os cartos recadados terán un fin solidario: serán doados a Cáritas e a Cruz Vermella.
Taburete é unha banda española de pop rock con influencias da rancheira, os boleros, o ska e o pop rock español. Foi fundada en Madrid en 2014. Cos seus dous primeiros discos no mercado Tres tequilas e Dr. Charas, conseguiron encher moitas salas de España durante a súa xira en 2017. En setembro de 2018 lanzaron o seu terceiro álbum Madame Ayahuasca.
