Alfonso Daniel Rodríguez Castelao (Rianxo, A Coruña, 1886 – Buenos Aires, 1950) constitúe o foco da exposición Castelao Grafista (Facsímile)que reunirá na Casa dos Poetas de Celanova unha ampla escolma das súas múltiples facetas. A intención deste proxecto de difusión internacional é divulgativo, mostrando a obra e o pensamento dun dos creadores galegos máis singulares en países dos cinco continentes.
A mostra reúne 19 facsímiles da Colección de Arte Afundación e 89 debuxos do álbum Cousas da vida de Castelao, dos que 49 pertencen á Colección de Arte Abanca; tamén obras procedentes doutras institucións, galerías e particulares. Así mesmo, poderase desfrutar de 3 retratos fotográficos, 4 caricaturas e 17 debuxos e portadas de revistas. Ademais, achegarase a posibilidade de ler o texto orixinal do álbum Nós e contemplar 2 manuscritos de Castelao, 18 portadas das primeiras edicións dos seus libros, 3 páxinas interiores, 14 portadas de libros ilustradas por Castelao e 3 debuxos.
A Casa dos Poetas en Celanova acollerá esta mostra desde o 6 de maio (ás 10.30 será a visita guiada inaugural) ata o 4 de xuño e poderase visitar de martes a venres de 10:00 a 14:00 e de 16:00 a 19:00 e os sábados de 11:00 a 14:00 e de 16:00 a 19:00.
Organizada pola Fundación Gonzalo Torrente Ballester, a Real Academia Galega de Belas Artes e Turismo de Galicia – Xunta de Galicia, a exposición é en palabras da Casa dos Poetas “o proxecto máis ambicioso para dar a coñecer e difundir a obra e o pensamento de Castelao nos cinco continentes”.
Esta exposición enmárcase en Cultura por Alimentos, unha iniciativa de Afundación a favor de FESBAL (Federación Española de Bancos de Alimentos). No acceso poderase facer entrega dalgún alimento non perecedoiro, que irá destinado ó banco de alimentos local.
