Suma Ribeira levará ao vindeiro pleno da Corporación de Ribeira unha iniciativa na que se reclama a reparación urxente dos danos sufridos pola senda peonil do río Sanchanás (Artes) e a elaboración dun proxecto técnico para “que a dita senda acade os mais altos estándares de accesibilidade en todo o seu percorrido”.
Suma Ribeira, a través do seu voceiro, Xurxo Ferrón, defenderá tamén que se dote a senda de carteis nos que se inclúan enlaces e códigos QR que faciliten información “ampla e diversa sobre a ruta”, e que inclúa, asemade, “información pormenorizada sobre as características da súa accesibilidade”.
O grupo cidadá sinala que estas moción responde “ás queixas que lles fixeron chegar varios veciños e veciñas sobre o estado da paseo, un dos máis importantes do concello, moi transitado sobre todo en época de bo tempo e cuxo proxecto for incluído, de feito, no denominado Ribeira Atlántica”.
Para Suma Ribeira, o acondicionamento desta senda, “como de calquera outra ruta que poña en valor a riqueza natural da contorna”, foi “unha boa noticia”, de aí a importancia de que se extreme o coidado da súa conservación, “cada vez máis deficiente e con zonas totalmente inaccesíbeis”, sinala Suma Ribeira, facéndose eco das reclamacións das persoas usuarias.
A agrupación fai constar que “o treito que se atopa en peor situación é o que está comprendido entre a ponte de Oleiros e o lavadoiro, “con grandes fochas, madeiras dos bordes rotas, lixo tirado por falta de papeleiras e carteis deteriorados”. Ademais, “é un tramo no que é imposíbel o paso a persoas con cadeiras de rodas ou con diversidades funcionais que lles ocasionen dificultades locomotrices”, explican dende Suma Ribeira, engadindo que tamén precisa traballos de arranxo o seguinte tramo en sentido ascendente, sendo o que discorre entre a ponte de Artes e o Muíño da Correa o que está mellor conservado (aínda que precisa “dunha limpa da maleza e da mellora na cartelería informativa”, sinalan).
