O salón de actos do Auditorio de Rianxo vai acoller o vindeiro 7 de maio a presentación de tres libros de poemas de Ricardo Seixo Fernández: Sinais, Coa Luz Negada e Na República da Intimidade. A tripla presentación literaria será ás 12.00 horas do sábado 7, e contarase coa presenza do autor e de Xosé Luís Axeitos (escritor e académico) e Adolfo Muíños Sánchez (alcalde de Rianxo). O programa tamén inclúe intervencións musicais e poéticas a cargo do colectivo Gosto de vivir a poesía (Asociación Veciñal Agra) e o Grupo Maraxe.
A reserva da localidade debe realizarse previamente na sección de reservas da web municipal e será efectiva cando se confirme dende o Auditorio (a confirmación non é inmediata).
Ricardo Seixo Fernández é un sobranceiro poeta natural de Curtis que ten publicado unha máis que notábel produción poética, na que se inclúen os tres libros que vai dar a coñecer en Rianxo e, entre outros, o poemario Versos noctámbulos, que foi dado a coñecer en Rianxo, precisamente, hai agora case tres anos e no mesmo escenario (o Auditorio).
Ricardo Seixo é poeta e mestre. Como autor tamén ten publicado outro libro de poemas: Ollares.
