Regresa á Pobra, logo da longa pausa da COVID, o programa de envellecemento saudábel da Pobra

O Concello da Pobra presentou este venres 8 de abril os detalles da nova edición do programa municipal de envellecemento activo, unha iniciativa que se retoma no seu formato tradicional logo de dous anos de paréntese pola COVID. A sede do programa será o Centro Sociocomunitario e de Benestar da Pobra do Caramiñal. O obxectivo é potenciar o benestar persoal da veciñanza maior, así como evitar ou adiar súa deterioración física e cognitiva. Así o fixeron saber o director do dito centro, Ricardo Lago, e máis a concelleira de Servizos Sociais, Amparo Cerecedo.

Lago salientou na presentación das actividades previstas “a importancia deste tipo de programas”, especialmente “dada a situación que vivimos nos últimos anos”. Entre os beneficios do envellecemento activo enumerou “a mellora da calidade de vida das persoas maiores, procurando que vivan no seu medio o maior tempo posíbel e que se poidan valer por si mesmas para as actividades da vida diaria”, ademais de evitar situacións de illamento na sociedade.

Pola súa parte, a concelleira dos Servizos Sociais, Amparo Cerecedo (BNG), anunciou que o programa que se presenta vén con dous cursos que seguen unha metodoloxía participativa e dinámica.

Durante o primeiro semestre, o envellecemento activo desenvolverase nos venres dende o día 22 de abril ao 10 de xuño, en horario de 18.00 a 20.00 horas, a cargo de persoas voluntarias da Cruz Vermella; mentres que a musicoterapia transcorrerá nos mércores dende o día 13 de abril ao 8 de xuño, en dúas quendas: de 18.00 a 19.15 horas e de 19.15 a 20.30 horas, da man de Ignacio Crespo. Xa no segundo semestre, o envellecemento activo terá lugar dende o día 30 de setembro ao 18 de novembro, e a musicoterapia impartirase do 19 de outubro ao 14 de decembro. Os horarios son os mesmos ca no primeiro semestre.

As inscricións pódense formalizar nas propias instalacións do Centro Sociocomunitario e de Benestar e estímase unha participación elevada, igual ca nas anteriores convocatorias.