A vila de Porto do Son acolle estes días unha mostra ao aire libre no recentemente acondicionado e humanizado bordo portuario, máis polo miúdo na Estacada. Trátase da exposicións Paisaxes e símbolos da nosa beiramar, que, como se indica no seu nome, fai un repaso histórico pola íntima relación que a veciñanza sonense mantivo co mar dende o asentamento da primeira pedra na localidade.
Así, a mostra propón unha viaxe por esa relación co mar ao longo da historia do concello, botando man de material variado (dende fotografías a mapas pasando por información textual presentada de xeito directo e ilustrativo). Amais, na exhibición ten especial protagonismo a colección dixital do Museo Marea, nutrida á súa vez das contribucións voluntarias das veciñas e veciños. En concreto, a mostra afonda nos diferentes oficios que se veñen levando a cabo na vila dende hai séculos, por exemplo as atadoras, os carpinteiros de ribeira, as fábricas de salgadura ou a conserveira de Pérez Lafuente. Complétase con paneis centrados na devoción e o lecer (a procesión e as regatas da Festa do Carme, o salón Miramar) e outros na orixe e na transformación das infraestruturas portuarias, con especial atención á vella dársena, A Comboa, cuxa silueta forma parte do escudo municipal desde hai máis dun século. A mostra tamén pon o foco nas estruturas en madeira (as estacadas e os seus parentes pobres, as varas) nas que se secaron redes e peixes.
