O Programa Integrado de Emprego 2021-2022 que leva a cabo o Concello de Boiro acolle hoxe unha xornada de Mobilidade Internacional co obxectivo de ofrecer alternativas de empregabilidade externa ás persoas participantes. O alcalde, José Ramón Romero; e o concelleiro de Promoción Económica, Carlos Muñiz, asistiron na mañá deste xoves 7 de abril á xornada na que participaron unha ducia de mulleres.
A actividade contou coa participación de Covadonga López López, conselleira de Eures, que explicou o funcionamento da Rede Eures e as oportunidades que ofrece para a busca de emprego, así como o manexo do seu portal de emprego e información de relevancia a nivel europeo. Durante a xornada interveu tamén Pilar Piñeiro, xefe de equipo de Europe Direct, que explicou como a entidade fai accesíbel o camiño cara a Europa para as persoas e, tamén, os diversos programas e políticas europeas que se están a desenvolver.
A xornada tivo como obxectivo “ofrecer alternativas internacionais ás participantes” para que “poidan mellorar o seu nivel de empregabilidade a través de información para a busca de emprego no estranxeiro, localización de ofertas de traballo, coñecer as condicións de vida en países europeos”. Durante a xornada deuse información das axudas existentes para o desprazamento e manutención no estranxeiro ou levar a cabo cursos de idiomas.
O Programa Integrado de Emprego 2021-2022 que desenvolve o Concello de Boiro está subvencionado pola Consellería de Emprego e Igualdade da Xunta de Galicia e está dirixido exclusivamente a 100 mulleres da comarca en situación de desemprego.
