O Concello de Boiro acondiciona os accesos ao miradoiro da Figueira en Cures

O Concello de Boiro vén de levar a cabo unha serie de actuacións de acondicionamento e mellora no miradoiro da Figueira, unha atalaia de gran interese paisaxístico, turístico e natural, dende o que se se poden desfrutar abraiantes vistas da ría de Arousa. Os traballos foron destinados a tirar proveito das posibilidades deste enclave de cara a tempada de primavera e verán.

As actuacións que se veñen de realizar contemplan a mellora da rede de pluviais e limpeza de cunetas; o acondicionamento da zona acceso e espazo para estacionamento de vehículos; así como o acondicionamento xeral do miradoiro.

O miradoiro do Coto da Filloa, tamén coñecido como A Figueira, está situado na parroquia de Cures e mostra unha vista da Ría de Arousa e as bateas. Moi preto deste recurso atopase a ruta das mámoas, formada por uns 30 monumentos funerarios.