Este sábado proxéctase no Coliseo Noela de Noia o documental “A virxe roxa”

O vindeiro sábado 9 de abril Cultura de Noia organiza a proxección da película A virxe roxa, documental dirixido por Marcos Nine e producido por Recrea Films. Será ás 20.30 horas no Coliseo Noela. Ao remate do filme desenvolverase un coloquio sobre a temática do mesmo. As entradas (de balde) cómpre solicitalas a través do correo programacionconcellodenoia@gmail.com, enviando datos como o nome e o DNI da persoa solicitante e o número de prazas que se precisan reservar.

O filme nárranos o asasinato de Hildegart Rodríguez a mans da súa nai Aurora, en 1933, dando forma a un documental experimental que recrea a conmoción sufrida pola sociedade española a raíz dun crime que serviu para converter a Hildegart Rodríguez nun referente para a esquerda da época. A película de Nine xunta testemuñas de expertos, imaxes de películas de principios do século XX e ilustracións do artista plástico Alberto Taracido, entre outros documentos e fontes que contribúen, en palabras da produtora, a “crear un conxunto hipnótico”.

Apoiado na narración de Antonio Durán Morris, e as interpretacións das actrices María Vázquez e Nerea Barros (que poñen voz aos pensamentos das dúas protagonistas), o documental é un achegamento directo a dúas vidas, as de Aurora e Hildegart, que reflicten os graves problemas da sociedade machista e reaccionaria daquel tempo (moitos deles aínda presentes).

Hildegart Rodriguez foi unha brillante e reputada intelectual dos anos previos á Guerra Civil. Con só dezaoito anos, era unha das mulleres máis destacadas da Segunda República española. Publicou varios libros sobre educación sexual e o papel da muller na sociedade moderna, foi xornalista e membro do partido socialista.