O Concello de Boiro propón para o seu debate no vindeiro pleno da Corporación a aprobación inicial do regulamento de honras e distincións dos corpos da Policía Local e Emerxencias. O borrador do texto ten como obxectivo “regular os elementos que poderán servir como distintivo, así como os supostos nos que se poderán outorgar as distintas condecoracións”.
O Concello lembra que na sesión plenaria de xuño de 2021 aprobouse a condecoración a dous axentes da Policía Local de Boiro pola súa actuación de auxilio a un veciño que sufriu un infarto na vía pública. Neste punto, o equipo de Goberno esgrime que no regulamento especial de honras e distincións co que se viña contando non se contemplaban aquelas que a Policía Local ou Emerxencias puideran recibir polo exercicio das súas funcións.
Obxectivos concretos
O regulamento que se propón para o seu debate na sesión plenaria correspondente ao mes de abril que se celebrará o vindeiro xoves día 28, ten como obxectivo concreto “detallar as razóns, feitos e condicións para a condecoración de medallas, honras e distinción aos corpos da Policía Local e Emerxencias”. Entre as distintas condecoracións están a medalla ao mérito profesional, servizos distinguidos, sacrificio no cumprimento do deber ou voluntariado.
O marco proposto recolle tamén os elementos das distintas distincións así como os supostos de concesión e os protocolos de entrega e os posíbeis casos de revogación de ditas distincións.
