A rapazada de Boiro vaise beneficiar da posibilidade de participar na nova edición do Campamento Deportivo da Deputación da Coruña, organizado pola súa área de Cultura e Deportes entre o 26 de xuño e o 29 de xullo, a través de cinco quendas. Ao concello de Boiro correspóndenlle 4 prazas na última quenda: entre os días 24 e 29 de xullo.
Esta actividade está destinada a rapaces e rapazas nados entre o 1 de xaneiro de 2008 e o 31 de decembro de 2013 e vaise levar a cabo nas instalacións do IES Rosalía Mera da Coruña. O campamento engloba actividades deportivas e culturais como son deportes náuticos, xornada de praia, visitas culturais… con xogos e actividades que axuden a fomentar a comunicación, a convivencia, o respecto aos demais…
O prezo do campamento é de 85 euros, que se deberán aboar unha vez confirmadas as prazas nun número de conta que se facilitará ás familias. O importe inclúe o transporte interno, estadía e manutención en residencia, así como todo o gasto que ocasionen as actividades programadas.
As inscricións poden formalizarse ata o día 20 de maio e, para a elección das persoas participantes, farase un sorteo público das prazas. Para realizar a inscrición as persoas participantes deben entregar no Rexistro Xeral do Concello de Boiro a ficha de solicitude que está dispoñible na web municipal e no propio departamento de deportes.