A Asociación Amicos celebrou este primeiro de abril o Día Mundial da Concienciación (que se celebra este sábado 2) sobre o Autismo. Fíxoo cun acto colectivo na praza do Concello no que participaron múltiples entidades e colectivos reivindicando máis apoio e máis recursos para as persoas co devandito trastorno. O punto culminante foi a elaboración dun mural onde cada quen mostrou a súa idea de Unha viaxe feliz pola vida, que é o lema da campaña do Autismo España deste ano. No mural léronse frases como “Na defensa dos dereitos das persoas con TEA. Feliz viaxe pola vida”, “O día do autismo non é un día, é todo o ano” ou “Para que non sexan necesarios os días de concienciación”, entre outras.
Alfonso Pérez, residente do Fogar Amicos foi o representante dos seus compañeiros e compañeiras con autismo e, por todos e todas eles e elas leu un manifesto no que reivindicaba que se doten dos recursos necesarios para vivir “nunha sociedade inclusiva e xusta para todos os cidadáns e cidadás. Temos que apoiarnos para que as persoas coñezan as nosas necesidades reais e eliminar mitos e estereotipos que provocan discriminación. Precisamos unidades de atención especializadas ao longo de todo o ciclo vital”, sinalou.
O alumnado do CEEPR de Amicos tamén quixo lanzar a seguinte mensaxe para que todos e todas tomen conciencia da importancia de apoiar ás persoas con trastornos do espectro autista: “Axúdanos a xogar, axúdanos a ser feliz”.
No acto estivo presente M. Emilio Pérez Outeiral, segundo tenente alcalde de Ribeira, que quixo agradecer o labor de Amicos por “traballar duramente pola integración” e recordou que “o Concello de Ribeira está sempre do lado de Amicos, esta é a súa casa e poden contar con nós para o que precisen”.
Pola súa banda, Luis Miguel Vázquez Carreira, subdirector xeral de Promoción da Autonomía Persoal e Prevención da Dependencia da Xunta de Galicia, sinalou: “Quero falar da importancia da implantación de un deseño universal pensado para todos. Queremos seguir avanzando para poder chegar a cubrir todas as necesidades das persoas con autismo facilitándolles apoios específicos para continuar coa súa educación, mellorar a súa formación e finalmente que poidan acceder a un emprego digno e de calidade”.
Pola súa parte, Silvia Agrafojo Filgueira, concelleira de Servizos Sociais, Igualdade, Xuventude, Educación, Cultura, Sanidade e Deportes de Lousame destacou a importancia de “traballar todos xuntos para lograr a integración” e “a educación é clave para a integración social”.
Dende Amicos agradeceron a colaboración de todos os concellos do Barbanza, así como das asociacións de empresarios e das persoas que axudaron á asociación a dar un paso adiante polo autismo e aportaron o seu gran de area para concienciar a toda a sociedade.
