Amicos entregou os diplomas do curso “Expendedor de combustible” en Rianxo

Amicos entregou hoxe a un total de 10 alumnos e alumnas a acreditación polo seu esforzo e traballo no curso titulado ‘Expendedor de Combustible’, que tivo lugar dende o luns 4 de abril ata hoxe na Aula Activa do Mar de Rianxo.
As persoas con discapacidade ou en risco de exclusión social, veciños do Concello de Rianxo, tiveron a oportunidade de formarse durante 20 horas nesta formación financiada pola Fundación La Caixa e o Fondo Social Europeo en colaboración con Amicos.
O alumnado mostrouse agradecido por ter a oportunidade de formarse neste sector e un dos
alumnos alí presentes quixo manifestar a súa satisfacción polos contidos recibidos e agarda poder encontrar un traballo neste ámbito o antes posible.
Na entrega de diplomas estivo presente María del Carmen Figueira Ares, Primeira Tenente de Alcalde de Rianxo: “No Concello estamos moi contentos de colaborar neste tipo de iniciativas, nas que se pretenden buscar novas saídas laborais ás persoas”.
Pola súa parte, Keltoi Cameán, Técnico do Programa ‘Más Empleo’ destacou que “é a primeira vez que decidimos realizar esta formación e estamos moi contentos pola acollida que tivo”.
Engadiu: “Agora empeza o traballo máis arduo que é a inserción sociolaboral das persoas que decidiron formarse connosco”.
O curso ‘Expendedor de Combustible’ forma parte do Programa ‘Más Empleo’, desenvolto en
colaboración de Amicos coa Fundación La Caixa e o Fondo Social Europeo.