A veciñanza de Porto do Son pode participar este venres nunha charla sobre a factura de luz (como interpretala e como reducila)

A Xunta de Galicia, a través do Instituto Galego do Consumo e da Competencia, vai celebrar este venres 22 de abril, en Porto do Son, unha xornada sobre a factura da luz. Nela achegaranse recursos á veciñanza para interpretala de maneira axeitada e, tamén, para evitar que se dispare nestes tempos de imparábel escalada dos prezos da enerxía. A charla abéirase ao ciclo Venres de Consumo Responde. A cita terá formato presencial e celebrarase a partir das 17.00 horas na Casa da Cultura de Porto do Son.

Nestes encontros do instituto coa cidadanía achégase ás persoas asistentes asesoramento sobre os conceptos básicos que figuran na factura da luz para a súa mellor comprensión, así como para a adopción de decisións que poidan axudar no aforro. Así mesmo, trasládanselles diferentes recomendacións, como solicitar as ofertas comerciais que se reciban sempre por escrito e seren cautelosos ao contratar fórmulas de cálculo do prezo da luz de difícil comprensión.