A USC divulgará contidos de fisioloxía, socioeconómica e cromática entre os maiores da Pobra

A Pobra do Caramiñal vai dar acollida á quinta edición do programa de democratización do coñecemento da Universidade de Santiago de Compostela (USC), o programa Camiños de Coñecemento e Experiencia, que difundirá entre a veciñanza maior de 50 anos da localidade coñecementos científicos, humanísticos e artísticos.

Farao mediante unha oferta formativa diversa que abranguerá, en concreto, as temáticas da fisioloxía, socioeconomía e cromática. Cada unha delas constará dunha sesión teórica e outra práctica a cargo de persoal docente vencellado a este proxecto que transcorrerá ao longo de todo o mes de maio.

As encargadas de presentar esta axenda formativa de primavera foron a concelleira da Cultura, Patricia Lojo, e a técnica municipal desta área, Fita Sanisidro. Segundo fixeron saber, as actividades comezará no 9 de maio co seminario O sono e os seus trastornos, da man de Mónica Antelo Martelo, quen regresará na xornada seguinte, día 10, para ensinar técnicas para conciliar o sono.

Xa no día 16 será a quenda de José Manuel Vázquez Lijó co seminario Tradición e modernidade nos escenarios galegos (1880-1950). Vellos e novos oficios e negocios. Volverá no día 24 cunha visita ao Museo do Pobo Galego, en Santiago de Compostela.

Nerea Varela Castro será a encargada de ofrecer o seminario Simboloxía das cores, no 18 de maio, para proseguir coa parte práctica mediante unha excursión polos arredores no día 19.

As aulas impartiranse en horario de 16.30 a 18.00 horas, no Auditorio do Museo-Valle-Inclán, agás para aquelas sesións que requiren saídas. A matrícula é gratuíta e as prazas son limitadas. A formalización das inscricións ou solicitude de información pódese realizar na Casa da Cultura Raquel Fernández Soler, co teléfono de contacto 981831545.