As novas instalacións do Punto de Encontro Familiar (PEF) do Barbanza en Ribeira recibiron este martes 19 de abril a visita da conselleira de Política Social, Fabiola García, quen salientou a axilidade coa que se puxo en marcha o servizo (en “só un ano”) e o seu potencial para beneficiar a ducias de familias da comarca. O PEF de Ribeira iniciou o proceso de espallamento destes puntos pola xeografía galega, uns servizos que até agora tan só tiñan presencia nas sete cidades. Nos vindeiros meses iranse achegando novos centros a outras localidades de Galicia, sinalou a conselleira.
García destacou que os Puntos de Encontro Familiar representan “un recurso fundamental para as familias e moi especialmente para os nenos en risco de desprotección”. Este servizo, dixo, “ofrece un lugar neutral e seguro para realizar as visitas establecidas por lei dentro dun proceso de separación”.
Fabiola García engadiu que “en menos dun ano a Xunta puxo en marcha este centro, que permitirá que os 66.000 barbanzáns e barbanzás non teñan que trasladarse ata Santiago ou á Coruña para ter un servizo de atención á infancia”. Así mesmo, destacou que este PEF estará xestionado por Meniños, “unha entidade cunha sólida traxectoria”, centrada na atención á nenez e que xa ten experiencia no Punto de Encontro Familiar de Pontevedra.
