A axenda da Semana Santa de Rianxo regresa aos formatos tradicionais de celebración

A Irmandade da Paixón de Cristo compartiu a axenda de actividades relixiosas programadas para esta Semana Santa 2022 que está a piques de comezar e que pasará á historia, en Rianxo e nos demais municipios da nosa comarca, como a festividade na que se puideron recuperar boa parte dos actos tradicionais principais das confrarías e irmandades.

En Rianxo, os días 6, 7 e 8 de abril haberá misas na honra da Nosa Señora dos Dolores. Os días 6 e 7 ás 10.00 horas e o día 8 ás 20.00 horas, con procesión (o día 8) ao rematar a misa. O día 10, Domingo de Ramos, comezará á procesión ás 11.45 dende a igrexa parroquial até a Capela da Nosa Señora da Guadalupe, con bendición dos ramos e regreso á igrexa para celebrar a Santa Misa. O día 13, Mércores Santo, celebrase o Vía Crucis penitencial polas rúas da vila, a partir das 21h. O Xoves Santo a Misa da Cea do Señor será ás 20.00 horas e a procesión ás 21.30 horas. O 15 de abril, Venres Santo, celebrarase o Santo Encontro ás 9.30 horas polas rúas de Rianxo. Contarase coa Banda de Tambores da Irmandade da Paixón de Cristo. Ás 10.30 será o Santo Encontro e ás 20.00 os Santos Oficios, a Adoración da Cruz e o Desencravo. Ás 22h será a procesión do Santo Enterro. O 16 de abril, Sábado Santo, será a Vixilia Pascual, a partir das 22.00 horas. O domingo celebrarase a Misa de Resurrección ás 12.30 horas. Organiza a Irmandade da Paixón de Cristo e colabora o Concello de Rianxo.