Celebrouse finalmente a cuarta xornada da Liga de Cruceiros Ría de Arousa 2022, organizada polo Club Náutico Arousa Norte (A Pobra do Caramiñal). Preto dunha vintena de embarcacións déronse cita na liña de saída.
O parte meteorolóxico auguraba un cambio de dirección do vento xusto a piques de comezar a proba, dun vento do nordés que viña azoutando a ría as xornadas anteriores a un suroeste de escasa intensidade que facía perigar o inicio da manga. Cando o comité de regatas saíu ao mar para comprobar a intensidade e dirección do vento atopouse cun suroeste duns 8 nós, condicións ideais para a práctica da vela. Decidiuse por montar a saída nas proximidades do porto pobrense e coa frota preparada para un percorrido polo interior da ría que consistiría na Volta a Rúa para a Clase Cruceiro e na Volta ao Sinal do Castro para o Cruceiro-Regata e Regata.
Nos primeiros compases os favoritos fixéronse donos e señores da cabeza da frota e tanto o Corsario como o Siradella na clase Regata e o Cámping Ría de Arousa na clase Cruceiro-Regata empezaron a ensinar a popa aos seus adversarios.
Despois de algo máis de 12 millas, o Siradella, do Real Club Náutico de Portosín, que non tomou a saída nas anteriores mangas desta regata, sorprendía aos seus rivais e levou a gloria na clase Regata por diante do vilagarcián Corsario e do Moucho do CND de Ribeira.
Na clase Cruceiro-Regata, unha vez máis, o Cámping Ría de Arousa, de José Manuel Pombar, do RO Yacht Club, volvía ao máis alto do podio e marcábase outro primeiro no seu marcador que o coloca como líder destacado nesta clase. Segundo posto para o Fixius, do Miguel Pérez-La Fuente e terceiro para o rianxeiro La Fanciulla, con Miguel Castro-Gil á cana.
Na clase Cruceiro, que realizaban un percorrido de 7,7 millas, dominio do ribeirense Galopín, que do mesmo xeito que o Cámping en Cruceiro-Regata conta por vitorias todas as mangas disputadas. Segundo posto para o pobrense Guillermo Varela e o seu incombustible Thor II e terceiro o Elora Danan, do Club Náutico Arousa Norte, que malia a falta de experiencia en regata, está a demostrar que aprende rápido e que xa lle planta cara a embarcacións máis experimentadas.
Os podios provisionais, a falta do descarte que se aplicará despois da seguinte etapa a celebrar en Vilagarcía o vindeiro 12 de marzo, vai da seguinte maneira:
LIGA DE CRUCEIROS RÍA DE AROUSA 2022
Clase Regata
1º Corsario de José Jorge Durán do CY de Vilagarcía, 5 puntos
2º Chispetrén de Jesús Iglesias do CN Arousa Norte, 8 puntos
3º Moucho de Daniel Ayaso do CND de Riveira, 8 puntos
Clase Cruceiro-Regata
1º Cámping Ría de Arousa de José M. Pombar do Ro Yacht Club, 3 puntos
2º La Fanciulla de Manuel Castro-Gil do CN de Rianxo, 10 puntos
3º A Píllara de Iago Ben do CND de Ribeira, 10 puntos
Clase Cruceiro
1º Galopín de Manuel Franco do CND de Riveira, 3 puntos
2º Thor II de Guillermo Varela do CN Arousa Norte, 7 puntos
3º Elora Danan de Diego Vazquez do CN Arousa Norte, 13 puntos
