Ribeira segue comprometida coas nosas letras nesta recta final de inverno. Así o certificou este venres 11 de marzo a concelleira de Cultura, María Sampedro, que presentou as actividades previstas polo Concello para conmemorar este mes dous grandes acontecementos culturais: o Día Mundial da Poesía e o Día Mundial Mundial do Teatro.
Seguindo este fío organizáronse dende o departamento de Cultura tres propostas teatrais dirixidas a público maior de 16 anos que terán lugar no Auditorio Municipal e serán de carácter gratuíto ata encher aforo.
A primeira delas terá lugar o 19 de marzo ás 20.30 horas para festexar o Día da Poesía e a Narración Oral. Consistirá na representación da obra Tres vellas polo menos da compañía Producións Teatrais Excéntricas: un espectáculo de palabras cruzadas e un repertorio de contos de vellas protagonizado por Celso Fernández Sanmartín, José Luis Gutiérrez “Guti” e o ribeirense Quico Cadaval.
Xa na seguinte semana, para honrar o Día Mundial do Teatro, haberá dúas representacións. O venres 25 ás 21 horas desenvolverase o espectáculo A Lúa vai encuberta, que resultou gañadora do II Certame Manuel María de proxectos teatrais. Trátase dunha peza arredor da realidade galega e da loita incesante para conformar unha identidade propia que xorde da unión das compañías Incendiarias e A Quinta do Cuadrante, dialogando desde a actualidade coa historia recente de Galicia.
Por último, o sábado 26 ás 20.30 horas, co patrocinio da Rede Cultural da Deputación, poderase gozar da comedia Un morto moi vivo da asociación Club de Maiores de Boqueixón, que conta a historia dun vello avarento que simula a súa morte e organiza o seu velorio para logo marchar a Brasil a desfrutar da vida.
María Sampedro animou á cidadanía a asistir “a estas tres atractivas propostas”, para as cales non se esixirá inscrición previa, pero si será necesario realizar o rexistro dos datos no propio Auditorio antes de entrar.
Sampedro engadiu que amais do devandito, o Grupo Municipal de Teatro de Ribeira estará o día 27 en Teo para representar a comedia de época O Rei Telesforo busca noiva (e quere noivo).
