Na mañá deste 9 de marzo arrincou a xornada intercentros que baixo o título Ribeira sen acoso ten lugar no noso municipio para incidir na problemática do acoso escolar a través de dous conferencias impartidas por Javier Pérez Aznar, un dos psicólogos máis prestixiosos que hai en España sobre este eido de actividade, presidente entre 2008 e 2019 da asociación NACE (Asociación No al Acoso Escolar).
A iniciativa está organizada en colaboración do CEIP O Grupo e o Concello de Ribeira e este primeiro relatorio matutino está dirixido tanto a alumnado deste centro, que se deron cita no Auditorio Municipal, como doutros centros educativos públicos e concertados do municipio.
Dunha maneira amena e interactuando cos rapaces asistentes, o psicólogo foi explicando os diversos elementos que caracterizan o acoso escolar (maltrato entre iguais, reiteración no tempo, intención de facer dano e abuso de poder), ilustrándoo co exemplo real de Iñaki Zubizarreta, famoso xogador de baloncesto que foi vítima de bullying no seu colexio e guía do programa televisivo Hermano Mayor.
Ademais, ás 19 horas no Auditorio Municipal haberá un segundo relatorio destinado a profesores, nais e pais que teñan interese na solución desta problemática. Haberá servizo de monitoraxe gratuíta no propio Auditorio entre as 18.30 e as 20.30 horas para facilitar a asistencia.
As xornadas están sendo retransmitidas por streaming na canle de YouTube do Concello.
