Outes e Noia instan á Xunta a retomar as obras da Ponte Nafonso canto antes

Os rexedores insisten tamén na urxencia de reparar o firme da AC-196

Os alcaldes de Noia e Outes, Santiago Freire e Manolo González, amosaron a súa preocupación polo retraso que están a sufrir as obras de mellora e posta en valor da Ponte Nafonso, que une aos dous concellos. As obras permanecen paradas dende as vacacións do Nadal logo de que dende a Consellería se iniciaran os trámites para realizar un modificado do proxecto que afectará á varanda que estaba inicialmente prevista, e que se prevé que pase a ser de pedra, segundo foron informados os rexedores polos responsables da obra.

Os rexedores indicaron que foron numerosos os veciños que lles amosaron o seu malestar polo retraso nas obras, xa que a circulación tanto peonil como motorizada, permanece cortada dende a paralización das obras. Do mesmo xeito, González e Freire instaron de novo á consellería para que canto antes de proceda a mellorar o firme da AC-196 que, en verbas do alcalde de Outes “cada día está máis deteriorada, e constitúe un perigo para o tráfico rodado e para os viandantes, aspecto que debería preocuparlle á Consellería”.