Os xogadores do Rotogal Boiro Voleibol pousaron con cans na Cachada antes do derbi contra o Emevé

M.A.- Antes do derbi do sábado 12 de marzo ante o Arenal Emevé, os xogadores do primeiro persoal do Rotogal Boiro Voleibol estiveron acompañados por varios cans da Asociación Protectora de Animais Moura sobre o parqué da Cachada.

Tratouse dunha iniciativa entre o club e a asociación a través da que se trataba de dar visibilidade á posibilidade de adoptar ou apadriñar aos cans.

A Asociación Protectora de Animais Moura desenvolveu o seu labor durante os últimos anos no Barbanza. As súas instalacións principais atópanse na Pobra do Caramiñal, pero tamén dispón de refuxios e casas de acollida para cans e gatos en Boiro e Ribeira. A través da iniciativa que levou a cabo o sábado, o Rotogal Boiro Voleibol quixo mostrar o seu compromiso coa comarca.