O sector pesqueiro pide unha rebaixa de 0,35 céntimos por litro de combustible


A Federación Galega de Confrarías de Pescadores solicitou ao Ministerio de Agricultura, Pesca e Alimentación unha rebaixa de “como mínimo” 0,35 céntimos por litro de combustible.

Así o acordou a xunta xeral da Federación, reunida de forma extraordinaria e urxente este sábado para analizar a situación do sector ante a subida do prezo do combustible.

Ademais, volveron a insistir en demandar a exoneración das cotas da seguridade social como mínimo ata o mes de xuño, un aspecto revisable a partir dese mes.

As confrarías galegas tamén acordaron participar na reunión da Federación Nacional de Confrarías de Pescadores, que está previsto que se convoque despois de que manteñan, a próxima semana, un encontro co ministro Luís Planas para analizar a proposta recibida. No caso de non ser atendidas as súas demandas, anunciaron que valorarán outras medidas “máis contundentes”.

O ministro de Agricultura, Pesca e Alimentación, Luís Planas, xa avanzou esta semana a intención do Goberno de articular unha serie de medidas para axudar ao sector pesqueiro polo incremento de prezos do combustible que estarán incluídas no ‘Plan de resposta ás consecuencias da guerra en Ucraína’, que está previsto que se aprobe o vindeiro martes 29 de marzo.

Federación Galega de Confrarías de Pescadores