Os nosos concellos son estes días un modelo de solidariedade e apoio co pobo ucraíno, cunha fronte común entre as administracións locais, as entidades sociais e a cidadanía que había tempo que non acadaba tal unanimidade e tal e fortaleza. Así, ás múltiples mostras de apoio materializadas a semana pasada diante dos consistorios de todos os concellos do Barbanza, uníronse accións concretas como a expedición Pegasus impulsada polo activista Rubén Lijó de Ribeira (en colaboración directa co Concello, Cáritas e a cidadanía de Ribeira) e tamén as diversas iniciativas xurdidas dende as administracións locais para poñer vivendas e opcións habitacionais a disposición das persoas refuxiadas que vaian chegando. Neste punto, as contribucións non se fixeron agardar e xa chegamos, co inicio desta semana, á cifra de medio cento de inmóbeis dispoñíbeis, un número que se agarde que vaia medrando a medida que se incremente a cantidade de persoas que foxen do conflito desencadeado polo Goberno ruso.
Por concellos, Ribeira xa notificou á FEMP a posibilidade de ocupar media ducia de propiedades (municipais e pertencentes a organizacións sociais), unha das cales xa foi estreada por seis persoas que recalaron na cidade grazas á dita expedición. O banco solidario de vivendas medra cada día, e esta fin de semana xa andaba roldando a vintena.
Rianxo ofertou nun primeiro intre dez prazas, aínda que abriu unha consulta para coñecer os recursos habitacionais a maiores cos que conta e o número de persoas que estarían dispostas a acoller familias ou crianzas, ou que poidan poñer a disposición casas ou habitacións (estas persoas deben poñerse en contacto co Departamento de Mocidade do Concello, a través de xuventude@concelloderianxo.gal e o teléfono 664181401). Polo que respecta a Porto do Son, o Concello anunciou que Cáritas deu luz verde para o uso solidario do edificio situado na Arnela, ao tempo que está a traballar para destinar ao acollemento de refuxiados o antigo convento de monxas da vila, que ten dous centenares de prazas.
Polo que respecta a Boiro, lembrar que a semana pasada a vila recibiu media ducia de nenos e nenas procedentes de Ucraína para ser acollidos por familias do municipio. As crianzas chegaron mediante a ONG Niños de Ucrania y Andalucía, coa que colaboran xa familias do municipio dando acubillo a nenos e nenas nos períodos non lectivos de Nadal e verán. O Concello de Boiro puxo a disposición das familias acolledoras os recursos necesarios para que puidesen chegar ao municipio e a asistencia necesaria ás familias para a súa estadía no Barbanza. Ademais, o Rotogal Voleibol e Cáritas están a traballar nunha campaña solidaria para levar material de primeira necesidade ao país de Europa do Leste.
Polo que atinxe á Pobra, a Administración local anunciou que contribuirá á acollida de persoas refuxiadas poñendo a disposición diversos espazos. O Concello estudará unha partida orzamentaria específica e outras formas de axuda como a recollida e traslado de bens doados por particulares.
