Boiro solidarizouse con Ucraína cunha concentración no Consistorio e recibindo media ducia de nenos refuxiados

O Consistorio de Boiro acolleu este mércores 9 de marzo un importante acto de solidariedade co pobo ucraíno, no que participaron membros da Corporación local. O acto consistiu nunha concentración silenciosa ás portas da Casa Consistorial como mostra de apoio e afecto a todas as persoas que nestes momentos están a sufrir as consecuencias do conflito bélico desencadeado pola Federación Rusa contra Ucraína.

Media ducia de nenos e nenas ucraínos en acollida

Amais do acto de concentración, o Concello informou de que media ducia de nenos e nenas procedentes de Ucraína chegaron na mañá deste 9 de marzo a Boiro para ser acollidos por familias do municipio. Os nenos e nenas recalaron primeiro Madrid, onde os recolleu un autobús para traelos a Boiro, onde foron recibidos polo concelleiro de Servizos Sociais, Raúl Treus, unha traballadora social municipal e un estudante que fixo de tradutor.

Os nenos e nenas viñeron mediante a ONG Niños de Ucrania y Andalucía, coa que colaboran xa familias do municipio acollendo a nenos e nenas nos períodos non lectivos de Nadal e verán. O Concello de Boiro puxo a disposición das familias acolledoras os recursos necesarios para que puidesen chegar ao municipio e a asistencia necesaria ás familias para a súa estadía aquí.

Raúl Treus, mostrou o seu agradecemento coas familias de acollida “por axudar nun momento tan difícil como este, sen coñecer ben cales son as condicións nin o tempo que van pasar con elas”. O Concello de Boiro pon a disposición das familias de acollida información e os trámites asistenciais para contribuír ás economías familiares.