O Concello da Pobra do Caramiñal seguirá as recomendacións da Coordinadora de Organizacións para o Desenvolvemento no que respecta á situación de emerxencia humanitaria en Ucraína. Por esta razón, daráselle prioridade no concello ás achegas económicas que canalizará a través “dunha ou varias ONG”, sinalaron fontes do Consistorio, engadindo que está previsto organizar eventos de carácter solidario coa pretensión de que se inicien na fin de semana do 11 ao 13 de marzo. Estes eventos “poderán ter continuidade de maneira indefinida mentres se manteña o conflito e as necesidades de axuda”, explicou o Concello, que fai un chamamento ao tecido asociativo e á colaboración de todas as persoas que teñan o desexo de ofrecer as súas aptitudes de xeito desinteresado.
A maiores, a Administración local recoñeceu que o equipo de Goberno local está valorando a posibilidade de habilitar unha partida orzamentaria con fondos propios mediante unha subvención nominativa a unha organización. Procurarase tamén contribuír á acollida de persoas refuxiadas poñendo a disposición espazos, valorando neste eido o alugueiro dunha vivenda para tal fin.
O Concello estudará tamén outras formas de axuda como a recollida e traslado de bens doados por particulares.
O Goberno municipal aproveitou para rexeitar “a actual situación” e condenar “a invasión por parte do exército ruso do territorio ucraíno, solicitando o cese inmediato de calquera acción de carácter bélico”.
