O IES Félix Muriel mostrará nun audiovisual online os seus esforzos por manter vivo o lume do galego

O Consello da Cultura Galega presentou este luns 21 de marzo os detalles dun novo proxecto destinado a mostrar a realidade actual do galego, e non dun xeito calquera, senón dunha maneira dinámica, participativa, creativa e atractiva para as novas xeracións. Estamos a falar do proxecto Aquí medra a lingua, que propón un convite audiovisual a coñecer os logros en materia lingüística de seis centros educativos da nosa xeografía, incluído o IES Félix Muriel de Rianxo. Trátase de media ducia de prezas breves máis un documental no que participaron preto de cincuenta persoas entre alumnado, docentes, familia e comunidade, coordinados polos equipos locais de dinamización lingüística.

O primeiro deses traballos presentouse este luns no IES Perdouro de Burela nunha xornada de convivencia na que participou a presidenta do CCG, Rosario Álvarez; a directora do centro, María José Pardiñas; a xefa de normalización lingüística do IES, Natalia Irimia; a realizadora dos audiovisuais, Cristina de la Torre, xunto co alumnado do centro. Na sesión proxectouse o primeiro dos capítulos, O modelo Burela, que xa está dispoñible na web do Consello da Cultura Galega (CCG).

A presidenta da institución, Rosario Álvarez, destacou que “este proxecto amosa seis realidades educativas e lingüísticas moi diferentes, todas elas moi positivas e a base do compromiso, creatividade e vontade de sumar esforzos das diferentes persoas”. Engadiu que “no espello do modelo Burela pódense ver outros galegos, é imitable noutros lugares de Galicia, ao mellor non no conxunto, pero si en parte”.

Burela, primeira parada

O Modelo Burela é o título do primeiro dos capítulos nos que está estruturado Aquí medra a lingua. Nel explícase un proxecto que arrincou no Instituto de Ensino Secundario de Burela en 2004, como unha intervención educativa destinada á transformación dos usos lingüísticos habituais tanto na comunidade escolar como no seu ambiente social inmediato. Entre outras cousas, fálase das iniciativas estrela do centro en materia de lingua e comunicación, como o programa de Radio Neo, resultado da colaboración entre Radio Burela e a área de Innovación Educativa do instituto.

Presentación do proxecto en Burela

O proxecto

Aquí medra a lingua é un proxecto deseñado pola Sección de Lingua, Literatura e Comunicación que coordina Carme Garcia Mateo, que busca amosar que as escolas son “un cómplice indispensábel na lingua galega e da súa transmisión”. As diferentes iniciativas están contadas polos seus propios protagonistas que ofrecen, en palabras do CCG, “un relato fiel dos proxectos que se están a desenvolver en diferentes centros de toda Galicia”. Esta contribución audiovisual, dirixida pola valdeorresa Cristina de la Torre, está estruturada en seis capítulos que arrincan con O modelo Burela, e que se irán subindo semanalente xunto cunha ficha descritiva de cada centro a un especial do web do Consello da Cultura Galega.

Continúa o 28 de marzo co episodio titulado Reforzar o propio do CPI Virxe da Saleta, e logo seguirán no IES Félix Muriel de Rianxo (4 de abril), no CEIP Barouta de Ames (11 de abril) e no CRA Nosa Señora de Ponteceso (18 de abril) para rematar o 25 de abril no CEIP Barouta de Moaña. Segundo explica Consello da Cutural, “son seis centros que están espallados por toda a xeografía galega, que amosan as diferentes accións de cada centro en prol da lingua, coas dificultades e vantaxes de cada caso”. Ao remate, todas esas visións xuntaranse nun documental único que condensa todo o material e que ofrece unha visión realista sobre o galego na escola.