Este xoves 24 de marzo marcará un antes e un despois en materia de deporte na nosa comarca, concretamente na Pobra do Caramiñal, que, como avanzamos dende O Barbanza, recibiu a visita do presidente da Deputación da Coruña, Valentín González Formoso, para comprobar in situ o estado do edificio de usos náuticos que alberga a actividade do Club Remo Puebla e anunciar o proxecto de mellora e ampliación (que abrangue a construción dun segundo ximnasio e a instalación dun ascensor, entre outros equipamentos). Tamén foi unha xornada relevante en materia de emprendemento e innovación, ao incluírse na visita unha “parada” no Centro de Coworking local, abeirado á Rede de Centros de Traballo Colaborativo da Deputación.
González Formoso e a deputada provincial Sandra González foron primeiramente recibidos na Casa Consistorial polos concelleiros e concelleiras que conforman a Corporación municipal. No acto de benvida, o alcalde, Xosé Lois Piñeiro (Nós Pobra), e a concelleira das Relacións Institucionais, Patricia Lojo (PSdeG-PSOE), agradeceron as contribucións da entidade provincial ás administracións locais para “a realización de diversas obras e o impulso de numeroso proxectos”. Ademais, fixéronlle entrega dun obsequio consistente nunha dorna de cerámica e procedeuse coa sinatura no libro de honra do Concello.
A continuación, efectuouse o desprazamento ata o propio edificio de usos náuticos, onde a comitiva foi recibida polo presidente do club, Antonio do Carmo, e os remeiros e remeiras que compoñen esta entidade deportiva con forte arraigo na localidade. Alí deron a coñecer o proxecto de mellora e ampliación que se levará ao pleno provincial deste 25 de marzo. O investimento ascende aos 394.738’30 euros, IVE incluído, dos cales a Deputación aportará arredor de 300.000 euros e o resto será asumido polo Concello.
A mellora das instalacións suporá a dotación dun segundo ximnasio, dunha sala de usos múltiples e dun despacho para a directiva; maior capacidade de almacenamento do material; renovación dos vestiarios; e mellora da accesibilidade que inclúe, por exemplo, a instalación dun ascensor. Ademais, a fachada principal contará cunha ampla cristaleira que incremente a iluminación natural e a comunicación visual co exterior.
A folla de ruta proseguiu no Coworking que recentemente se incorporou á Rede Provincial de Espazos de Traballo Colaborativo. Creado en 2017, o centro pobrense consta dunha área de 143’23 metros cadrados con capacidade para acoller 10 iniciativas emprendedoras: o espazo Emprende, con cabida para 8 módulos de traballo e destinado preferentemente a persoas emprendedoras que desexen crear a súa propia empresa, e o espazo Nómades, con 2 módulos dirixidos a persoas usuarias externas que non permanezan de xeito continuado.
E, finalmente, achegáronse ata a Casa da Mocidade que se estrutura nunha ampla área multiusos (con escenario, equipamento de son, pantalla, proxector e mobiliario), nunha sala de traballo (dotada de mesas, ordenadores portátiles e unha pantalla táctil), e en dous obradoiros que forman parte do FabLab.
