O Concello de Boiro contratará 7 peóns de obras, limpeza e mantemento mediante o PEL

O Concello de Boiro confirmou a recepción dun importe de 52.000,00 euros para a contratación de persoal mediante as axudas destinadas á execución de obras e servizos nos concellos da provincia durante o exercicio 2022 (PEL-Concellos) que convoca a Deputación da Coruña. Este importe, sumado á achega municipal, vaise destinar á contratación de 7 peóns durante 5 meses a xornada completa, mediante os que se reforzarán os departamentos municipais que traballan en servizos básicos.

O persoal contratado polo Concello de Boiro estará ligado a tarefas de limpeza viaria, recollida de residuos, mellora de accesos a núcleos de poboación ou parques públicos.

O Plan de Emprego Local (PEL) da Deputación da Coruña ten como obxectivo “acadar uns maiores niveis de desenvolvemento económico, calidade de emprego, benestar social e cohesión do territorio”. O Concello de Boiro, mediante a súa participación neste programa, busca “fomentar o emprego e a empregabilidade mediante a contratación de persoal en situación de exclusión laboral, así como reforzar os departamentos municipais dedicados aos servizos básicos como é a limpeza e o mantemento de espazos públicos”.

O persoal a contratar debe estar en situación de desemprego e atoparse nalgunha situación de exclusión laboral como ser maior de 45 anos, estar en situación de desemprego de longa duración, situación de discapacidade, vítima de violencia ou situación de drogodependencia.

O proceso selectivo abrirá nas vindeiras semanas e as bases estarán publicadas na web municipal, www.boiro.gal, a disposición das persoas interesadas.