O Concello de Boiro anunciou este 15 de marzo unha importante mellora na área de estacionamento da rúa Cruceiro, preto do núcleo urbano da vila, onde se habilitaron preto de corenta prazas de aparcamento. O obxectivo foi impulsar a mobilidade e crear novas prazas para “favorecer o acceso ás zonas comerciais”. O alcalde, José Ramón Romero, e o concelleiro de Urbanismo e Obras, Luís Ruiz, visitaron na mañá deste martes 15 o novo estacionamento que xa se atopa aberto ao público. Segundo fixeron saber, os traballos serven de complemento ás actuacións que se realizaron na zona de Bao e na rúa Nova, dirixidos a pavimentar e reordenar os espazos de estacionamento, con vistas a “aumentar a seguridade viaria e mellorar a fluidez do tráfico na zona”.
Segundo engadiron Romero e Ruiz, “ofrecer servizos como a facilidade para aparcar é fundamental para a veciñanza e tamén para o comercio local, polo que a seguridade viaria e a fluidez do tráfico son unha prioridade para este Goberno”.
O alcalde fixo saber ao abeiro dos traballos despregados habilitáronse unhas vinte prazas nunha finca que se atopaba sen acondicionar. O sistema de arrendamento das parcelas foi mediante a sinatura dun convenio cos propietarios polo importe do valor do IBI. “Deste xeito as persoas propietarias non teñen que aboar o imposto e non se teñen que ocupar do mantemento da finca”, afirmou o alcalde.
Romero e Ruiz sinalaron que o Concello empregou sistema de arrendamento por valor do IBI noutras parcelas para dotar o núcleo urbano de novos espazos de aparcamento. O obxectivo é seguir con esta fórmula naqueles lugares nos que existen dificultades de estacionamento para acondicionar novos aparcamentos en Escarabote, Espiñeira ou na avenida da Constitución.
