O Concello da Pobra mellorou os espazos cardioprotexidos da vila. Fíxoo instalando novos desfibriladores nos seus 8 espazos cardioprotexidos: sete fixos en instalacións deportivas e edificios públicos (Pavillón da Tomada, Polideportivo de Venecia, Estadio da Alta, Campo de Fútbol de Cadreche, Edificio de Usos Náuticos, Casa Consistorial e Praza de Abastos) e un móbil nun dos vehículos da Policía local. O Concello explicou que a selección dos espazos responde “aos criterios de maior concorrencia e de realización de actividades que supoñen un esforzo físico”.
O concelleiro da Seguridade, José Andrés Lojo (Nós Pobra), sinalou os dispositivos foron colocados en 2018 e que agora renóvanse por outros dun nivel superior que “incrementan a porcentaxe de supervivencia en caso de ser necesario o seu uso”. O novo sistema, engadiu, inclúe unha mellora dos ciclos de reanimación cardiopulmonar, as indicacións dos pasos por seguir e o seu correcto proceder, a análise do estado da ou do paciente, a incorporación da función pediátrica e a conexión Wi-Fi para “asegurar a operatividade en todo o momento”. Isto, dixo, tradúcese na mellora da oferta económica no alugueiro e mantemento dos disfibriladores a cargo de Proyecto Salvavidas, pois o investimento pasa dos 7.400 euros anuais aos 5 600 euros anuais, “pero con maiores funcións”.
Así mesmo, estase impartindo actualmente formación sobre o seu uso a persoal municipal, entidades deportivas e traballadores e traballadoras do mercado municipal para garantir o correcto uso dos aparellos e saber como actuar ante unha parada cardiorrespiratoria.
