O Parque Natural de Corrubedo recibiu este martes 22 de marzo a visita da conselleira de Medio Ambiente, Ángeles Vázquez, que estivo acompañada do alcalde de Ribeira, Manuel Ruiz, e outros representantes do Concello e da dirección do complexo. Na visita, encadrada nos actos de celebración do Día Mundial da Auga (e tamén na campaña 7 días, 7 parques), Vázquez informou de que en abril comezarán os traballos para frear o avance do bosque de piñeiro na contorna do parque e “protexer a integridade da duna costeira de Corrubedo”. Destinaranse para este fin 383.614 euros, contándose para este fin con financiamento da Unión Europea a través de Fondos NextGenerationEU.
Vázquez engadiu que hoxe en día “as masas de piñeiros están a ocupar espazos que en orixe formaban parte dos areais e sistemas dunares, polo que se eliminarán os pés destas especies e faranse rozas selectivas dos restos leñosos, co fin de evitar danos na flora, impedir a incorporación de materia orgánica e reducir os riscos de incendio”.
Vázquez Mejuto lembrou que este proxecto “tamén prevé a caracterización dos dez polígonos nos que se actuará, o que permitirá a dixitalización dos recursos naturais existentes”. Segundo manifestou a conselleira, a” mellora e recuperación dos ecosistemas naturais, permitirá garantir unhas boas condicións de hábitat para as especies que se localizan neste espazo, como a píllara das dunas, o pernileiro, o sapo de esporóns; así como plantas dunares endémicas como Iberodes littoralis Subsp. gallaecica e a orquídea Spiranthes aestivalis, incluídas no Catálogo galego de especies ameazadas”. Engadiu que este tipo de iniciativas “son acordes aos obxectivos e metas que recolle o Plan reitor de uso e xestión do Parque Natural”, aprobado en maio de 2021 e que prevé “un investimento de 6,5 millóns de euros na próxima década; para poñer en valor a contorna natural deste parque que abarca 996 hectáreas”.
O alcalde de Ribeira agradeceu á conselleira que se achegara ata Corrubedo no Día Mundial da Auga para axudar na concienciación sobre a necesidade de “preservar un ben tan importante como é a auga e, sobre todo, neste espazo dominado pola lagoa de Carregal e Vixán”.
