Heredeiros da Crus publican este venres en todas as plataformas o seu álbum postpandémico

Unha das bandas máis importantes do panorama galego e estatal, Heredeiros da Crus, está de volta no mercado discográfico cun novo e agardado traballo. Trátase do álbum Xira Angústica Live in A Coruña, que, en palabras dos Heredeiros “recolle a experiencia do ano postpandémico”. Con este novo traballo tamén festexan os 30 anos de actividade da banda do Barbanza, posta en macha hai tres décadas por músicos (e amigos) de Castiñeiras (Ribeira), O Conchido (A Pobra) e Boiro.

Este venres 11 de marzo sairá en todas as plataformas dixitais Xira Angústica. Live in A Coruña, un traballo gravado o pasado ano no recinto PALEXCO da Coruña no que foi o seu derradeiro concerto neste formato e e que culminaba un ano (o 2021) de regreso aos escenarios tralo período máis cru da pandemia. Foi, explican, “un proposta fóra dos nosos estándares habituais, que nos situou nun marco acústico onde realizamos unha profunda revisión do repertorio dos Heredeiros”. A xira percorreu Galicia durante o verán: Boiro, Bueu, Rodeiro, Melide ou propio PALEXCO, foron algunhas das citas.

Neste novo traballo discográfico, Heredeiros da Crus aposta por amosar “unha faciana totalmente novedosa e descoñecida, pero tremendamente impactante” da súa capacidade creativa. Melodías espidas de fogos de artificio que crean novos himnos a escribir na historia da música en Galicia.