Evacuado un tripulante tras sufrir un incidente nunha embarcación en Noia

O tripulante dunha embarcación resultou ferido de diversa consideración tras verse implicado nun incidente cando se atopaba nas inmediacións da praia de Testal, no concello de Noia, na Coruña. De acordo coas indicacións do particular que chamou ao 112 Galicia para comunicar o suceso, o ferido foi arrastrado por un cabo e necesitaba asistencia médica urxente.

Os xestores do 112 tiveron constancia dos feitos ao fío das 12:15 horas da mañá de hoxe. Axiña, desde o Centro Integrado de Atención ás Emerxencias de Galicia informouse da situación aos profesionais de Urxencias Sanitarias de Galicia-061, que mesmo valoraron enviar a aeronave medicalizada, ata que comprobaron que o estado do ferido permitía a súa evacuación en ambulancia.

Nada máis ter constancia da chamada do particular, o 112 Galicia puxo os feitos en coñecemento do persoal de Salvamento Marítimo e do Servizo de Gardacostas de Galicia. Ademais, para prestar apoio ao equipo médico, avisouse aos membros do GES de Noia, aos axentes da Garda Civil e á Policía Local.