A iniciativa de formación, divulgación e traballo participativo Espazo Familias, a través da Escola de Nais e Pais (ENAPA) e coa colaboración do Concello de Boiro, leva a cabo unhas xornadas formativas para as familias e persoas interesadas na poboación infantoxuvenil. Neste marco de actividade celebrarase este mércores ás 18.00h na Casa da Cultura de Boiro a charla As pantallas transfórmannos!. O concelleiro de Servizos Sociais, Raúl Treus, e a directora do IES Praia Barraña, Andrea Herrero, presentaron este luns 7 de marzo a xornada acompañados de persoal directivo e orientador dos centros.
Segundo fixeron saber, a actividade contará coa participación de Teresa Piñeiro, experta en socioloxía e ciencias da comunicación que focalizará a atención na nocividade de certas condutas derivadas do uso das pantallas tecnolóxicas e como estas se traducen en modificacións da nosa estrutura cognitiva e do noso comportamento. As pantallas transfórmannos! ten como obxectivo dar a coñecer problemas detectados no alumnado como a diferencia entre a realidade e a ficción e a dificultade de atención.
A iniciativa deste ciclo de charlas nace dunha posta en común dos distintos centros de ensino e están vertebradas en torno ao impacto das TIC (Tecnoloxías da Información e a Comunicación) entre os menores. Con ese ciclo de xornadas impartidas por profesionais en diversos ámbitos búscase “levar a cabo unha reflexión” e “poñer sobre a mesa posíbeis solucións de xeito que a participación das familias sobrepase os muros dos centros”.
O Concello de Boiro habilita un servizo de canguraxe para as persoas interesadas en asistir.
