A Deputación achega preto de medio millón de euros para a modernización e a mellora das confrarías

A Deputación da Coruña anunciou esta semana que vai destinar preto de medio millón de euros para apoiar ás confrarías de pescadores da provincia. Este 3 de marzo abre o prazo para solicitar as subvencións destinadas a apoiar aos pósitos na contratación de persoal e modernización dos procesos de produción e comercialización.

En concreto, a entidade provincial destina 462.000 euros na devandita liña de apoios ás confrarías de pescadores e agrupacións de mariscadoras e mariscadores. A través deste programa de apoio ás confrarías, os pósitos coruñeses poden optar a axudas de entre 1.500 e 30.000 euros que poden destinar á contratación de persoal, adquisición de sementes de moluscos, alugueiro de maquinaria ou equipamentos necesarios para o desenvolvemento das actividades de confrarías, lonxas ou fábricas de xeo ou contratación de servizos externos, como a vixilancia das autorizacións marisqueiras.

O deputado de Promoción Económica, Blas García, anunciou este 3 de marzo ábrese o prazo de solicitudes desta liña de subvencións, que se poderán tramitar de xeito telemático a través da plataforma SUBtel ata o vindeiro 24 de marzo ás 14.00 h. O deputado lembrou que o ano pasado 27 pósitos e agrupacións de mariscadoras e mariscadores recibiron o apoio económico da Deputación para manter a súa actividade.

Tamén, este mércores 2, o Boletín Oficial da Provincia (BOP) publicou o extracto das convocatorias das dúas liñas de subvencións dirixidas a entidades para a realización de actividades e investimentos de promoción económica neste ano 2022 e que, en total, contan cun orzamento de 750.000 euros.

Estes programas diríxense a entidades sen ánimo de lucro tales como colexios e asociacións profesionais; cámaras de comercio; entidades asociativas e representativas dalgún sector profesional, comercial ou empresarial; e asociacións de veciños e veciñas e de mulleres rurais.

No caso da liña para a realización de actividades, as solicitudes poden presentarse a través da plataforma SUBtel ata o 24 de marzo e, para as axudas á realización de investimentos, o último día para presentar a documentación é o 30 de abril.