Emotiva homenaxe de despedida a Caliche no Consistorio de Boiro pola súa xubilación

Os traballadores municipais do Concello de Boiro participaron este mércores 23 de marzo nunha emotiva homenaxe de despedida pola súa xubilación a Carlos García Blanco, Caliche, que traballou máis de 30 anos no servizo municipal de augas. O alcalde, José Ramón Romero, e demais membros do Goberno tamén estiveron presentes na despedida xunto co persoal municipal.

Todos os traballadores municipais reuníronse no hall do Consistorio ao remate da xornada laboral para despedir ao empregado público que, mediante a revisión dos contedores veu como evolucionou o municipio. “Todo o que sabe aprendeuno do seu antecesor, Moncho Ares, que apuntaba as incidencias que detectaba nun paquete de Ducados”, afirmaron os seus compañeiros.

O traballo evolucionou moito ao longo dos anos, cando comezou revisaba uns 2.000 contedores cada trimestre e agora uns 13.000 cada tres meses. O Concello de Boiro traballa para a informatización e modernización do proceso de lectura de contedores que Caliche realizou durante máis de 30 anos.