Cruz Vermella, JEALSA e a rapazada de Boiro plantan árbores autóctonas no río Breiro

Cruz Vermella en Boiro e a conserveira local JEALSA realizaron na xornada deste 16 de marzo unha plantación colectiva de árbores autóctonas no estanque e no paseo do río Breiro. A iniciativa abeirouse ao proxecto Ludieduca e ao programa corporativo de responsabilidade social e medio ambiental da conserveira, We Sea. Na xeira de traballo participaron 130 nenas e nenos dos centros educativos de Abanqueiro, Cespón, Escarabote, Praia Xardín, Sta Baia e Sta María do Castro. Baixo a lema Plantar unha árbore é a mellor maneira de prolongar a nosa vida, os participantes aprenderon a través desta acción “o gran valor que ten a natureza, aprender a coidala e respectala”, sinalaron as entidades organizadoras da xornada de traballo.

O proxecto Ludieduca naceu no ano 2012 como experiencia piloto da asemblea de Cruz Vermella en Boiro e, grazas á colaboración de JEALSA, na actualidade a súa actuación realízase en centros educativos de Boiro e a Pobra do Caramiñal. O seu obxectivo é fomentar a participación na sociedade e a educación en valores dos máis pequenos a través de actividades lúdico-educativas. Na aula, os nenos e nenas en idades comprendidas entre os 8 e os 9 anos, traballan temáticas diversas como a igualdade, a integración de persoas inmigrantes, a alimentación e os hábitos de vida saudábeis ou o medio ambiente, entre outros. Ademais, desenvólvense accións de lecer e tempo libre fóra do centro educativo e unha excursión cultural anual.

“A educación ambiental é unha parte fundamental do proxecto LudiEduca e estamos seguros de que coa plantación realizada esta mañá os nenos e nenas non só contribuíron a dotar a este espazo de máis árbores, senón que axudaron a unha maior concienciación de toda a sociedade. O noso agradecemento a todos os participantes e sobre todo a Cruz Vermella por facer posible este proxecto”, manifestou Margarita Hermo, directora de Relacións Institucionais da conserveira boirense.

No marco do seu propósito de contribuír a mellorar a sociedade, JEALSA e Cruz Vermella uníanse no fomento de valores humanos na nenez, un feito que, segundo sinalaron, “contribúe ao desenvolvemento do individuo e á formación de cidadáns comprometidos e implicados coa sociedade”.