Amicos celebrará o Día Mundial do Autismo en estreita colaboración coas asociacións de empresarios do Barbanza

A Asociación Amicos presentou este 24 de marzo o programa de actividades que levará a cabo para conmemorar o Día Mundial de Concienciación sobre o Autismo, que se celebra o vindeiro sábado 2 de abril. Amicos contará coa colaboración das asociacións de empresarios de Boiro (ABE), Ribeira, Porto do Son, Rianxo (ARE), Pobra, Noia (Noia Histórica) e, tamén, da Asociación Somos Rianxo. A entidade comarcal de persoas con diversidades funcionais sinalou nesta edición retómase a iniciativa de decorar os escaparates dos comercios e negocios locais de azul e da utilización de pictogramas para identificar o tipo de comercio. “Desta maneira, trátase de crear contornas máis accesíbeis para conseguir a inclusión en todos os ámbitos da sociedade”, sinalan dende Amicos.

Porén, haberá novidades. Por exemplo a realización dun sorteo para incentivar a compra no comercio local. A través desta iniciativa, todas aquelas persoas que merquen produtos e servizos nos establecementos de Boiro, Ribeira, Pobra, e Rianxo, entre o 24 de marzo e o 2 de abril, entrarán nun sorteo de 5 vales por valor de 50 euros proporcionados pola asociación de empresarios de cada concello. O premio deberá gastarse nos comercios adheridos ás patronais de Boiro, Ribeira, Rianxo, Pobra e Somos Rianxo.

Para participar no sorteo, ademais de mercar nos locais de proximidade, as persoas participantes deberán enviar o tícket de compra e co seu nome completo, teléfono e email a seguinte dirección de correo electrónico: diadoautismo@amicos.org.

Por outra parte, os comercios que mellor adobíen e iluminen de azul a súa tenda participarán de forma gratuíta no calendario solidario 2023 de Amicos. A asociación advirte á cidadanía que é “moi importante” compartir as fotos a través do teléfono 697 41 91 10 ou etiquetando a Amicos en redes sociais.

Alfonso Pérez, residente do Fogar Amicos agradeceu a colaboración da asociación de empresarios e animou a comerciantes, colexios e concellos a decorar de azul para visibilizar o autismo. Asemade, Pilar Sampedro, responsábel de Atención Integral Amicos, fixo o seguinte chamamento: “Pedimos á comunidade que apoie a estas persoas con estas pequenas accións”. Explicou tamén que os colexios, ademais de decorar de azul, tamén poden enviar unha mensaxe mostrando o que é para eles unha viaxe feliz pola vida “dando renda solta a súa imaxinación”. E engadiu: “Todas aquelas persoas que queiran colaborar tamén poden enviar a través das nosas redes sociais o que sería para elas unha feliz viaxe pola vida”, xa que é o lema da campaña do Autismo España deste ano.

Pola súa banda, Manuel Tomé, presidente da Asociación de Empresarios da Pobra do Caramiñal comprometeuse a formar “parte activa para que este proxecto se manteña no tempo”, polo que asegurou que faría un chamamento a todos os comerciantes do concello para participar.

Rematou as intervencións Xoan España, director xeral de Amicos: “O obxectivo da campaña é amosar que na sociedade na que vivimos existen persoas que teñen necesidades especiais e diferentes” e “que esa diversidade fainos máis ricos porque eles poden aportar moitos dos valores que precisamos”. Rematou a intervención destacando a importancia da campaña para a “transformación da sociedade” e recalcando “o valor da cidadanía compartida”.