Amicos activa a primeira formación presencial do seu Programa Integrado de Emprego

Amicos inaugurou este mércores 30 de marzo a formación presencial do seu Programa Integrado de Emprego (PIE). Foi no Viveiro de Empresas de Boiro. Até este venres, 15 alumnos e alumnas formaranse durante outras tantas horas en operacións básicas de caixa. A vertente teórica irá acompañada de prácticas en diferentes supermercados da comarca.

Sofía Riveiro nun intre da sesión

O obxectivo da formación é “que o alumnado aprenda a realizar as operacións básicas e elementais cunha caixa rexistradora, así como realizar cobros e pagos cos distintos sistemas existentes”.

O curso estará a cargo de Sofía Riveiro, coordinadora de formación en Recursos Galicia, que destacou a importancia de “equilibrar formación con inserción laboral”. Aconsellou deste xeito a todos os alumnos e alumnas: “Aproveitade o tempo que ides pasar aquí” para “adquirir as capacidades que grazas a programas como estes podemos adestrar”.

Asemade, as técnicas do Programa Integrado de Emprego, Rocío Vázquez e Estefanía Pérez, supervisarán e axudarán a que o curso se imparta con normalidade e que todos e todas os e as participantes poidan inserirse no mercado laboral.

Rocío Vázquez e Estefanía Pérez valoraron positivamente a formación iniciada considerando que “pode abrir portas a nivel laboral para o alumnado participante”, xa que esta formación será complementada polo curso de Elaboración de pezas cárnicas e atención ao cliente, que dará comezo o vindeiro luns, 4 de abril.

Isis Lijó, experta docente especializada en comercio, é a persoa que impartirá a formación de Operacións básicas de caixa. Na primeira sesión deste mércores salientou a importancia deste curso para “axudar ás persoas asistentes a atopar un emprego”.

O Programa Integrado de Emprego está promovido por Amicos e financiado pola Xunta de Galicia e o Servizo Público de Emprego Estatal, Ministerio de Traballo, Migracións e Seguridade Social.

Isis Lijó nun momento da actividade