Representantes do Concello da Pobra mantiveron este martes 8 de marzo unha xuntanza de traballo co deputado provincial de Marea Atlántica, Alberto Lema, co obxectivo de traballar en conxunto arredor do proxecto de mellora e ampliación do edificio de usos náuticos que acubilla a actividade do club de remo local.
Participaron na reunión, amais de Lema, o alcalde da Pobra do Caramiñal, Xosé Lois Piñeiro (Nós Pobra), xunto coas concelleiras das Relacións Institucionais, Patricia Lojo (PSdeG-PSOE), e dos Servizos Municipais, Estefanía Ramos (Nós Pobra).
O deputado sinalou que ao abeiro dos acordos orzamentarios co Goberno provincial do 2022 inclúese esta proposta co obxectivo de “mellorar as prestacións e cubrir as necesidades dun deporte que ten forte arraigo nesta vila”. Amais, cualificou o proxecto de “ambicioso e de gran envergadura”. Engadiu que a previsión é levalo ao pleno provincial de marzo para a súa aprobación, o cal se traducirá nun financiamento do 80% da obra por parte da entidade provincial.
Xosé Lois Piñeiro dixo que o investimento neste proxecto ascende aos 394.738’30 euros, IVE incluído, dos cales a institución provincial aportará arredor de 300.000 euros e o resto será asumido pola Administración local. Isto, engadiu, redundará en “suplir unha necesidade que se fixo moi urxente no noso concello”. A falta de espazo fixo que, actualmente, o club “non ocupe só o edificio de usos náuticos, senón tamén, en precario, unha nave na zona portuaria que no seu día se dedicou á actividade empresarial”. O mandatario local aproveitou a ocasión para expresar o seu agradecemento por tódalas xuntanzas mantidas tamén cos deputados provinciais socialistas para lograr chegar a este acordo.
Posteriormente, visitaron diferentes espazos da localidade coma o parque infantil da Lombiña, cuxa rehabilitación se atopou ao abeiro do POS+2021 da Deputación da Coruña; as estradas provinciais DP-6703 e DP-6704 para a valoración de propostas de mellora; ou o Coworking Pobra que acaba de sumarse á Rede Provincial de Espazos de Traballo Colaborativo.
