Aberto ata o 23 de maio o prazo de presentación de obras ao XVI Premio Raíña Lupa de literatura infantil e xuvenil

A Deputación da Coruña comunicou que o 23 de maio rematará o prazo e presentación de orixinais ao XVI Premio Raíña Lupa de literatura infantil e xuvenil, convocado pola entidade provincial e dotado con 6.500 para a obra gañadora.

Poderán participar todas as persoas, maiores de idade, que non fosen galardoadas nos cinco anos anteriores e que presenten narracións en lingua galega inéditas, non premiadas en ningún outro certame, nin publicadas ou rexistradas, total ou parcialmente. A Deputación publicará a obra premiada, directamente ou a través doutra editorial.

“Este”, sinala o responsábel provincial de Cultura, Xurxo Couto, “é un premio con vontade de fomentar a creatividade literaria dirixida ao mundo dos máis pequenos e pequenas e facer memoria desta personaxe de lenda vinculada ás terras de Compostela”.

Que se me pare o corazón se te esquezo, da escritora Andrea Maceiras, foi a obra premiada en 2021, edición á que se presentaron 43 orixinais e arredor da que a institución provincial elaborou un programa de actividades para render homenaxe a unha das figuras relevantes da literatura galega contemporánea, Agustín Fernández Paz, primeiro gañador do certame, en 1998, coa novela Cos pés no aire. Xosé A. Neira Cruz, con “ enigma de Santiago, en 2020; Valentín Alvite Gándara, con Antía e Daren, en 2019; e An Alfaya, con O Grupo, en 2018, fixéronse tamén co galardón en convocatorias recentes.