A rapazada do IES A Cachada erradica especies invasoras no río Coroño e na praia de Barraña

O medio natural de Boiro recibiu esta tempada a axuda do IES A Cachada, a través do seu Club da Ciencia, impulsado dende o Concello (Concellería de Medio Ambiente) co obxectivo de formar á mocidade local en como protexer os tesouros ambientais da súa contorna, como identificar especies exóticas e como erradicalas. Isto foi precisamente o que levaron a cabo as rapazas e os rapaces nas contornas da praia de Barraña e o esteiro do río Coroño.

Nas xeiras de traballo ambiental participaron un total de 24 alumnos e alumnas de 1º e 2º da ESO que, acompañados polo profesorado do centro e un técnico forestal do Departamento de Medio Ambiente con experiencia en actuacións deste tipo. Actuaron sobre a Arctotheca calendula e Carpobrotus edulis na praia de Barraña e no esteiro do río Coroño. “Estas especies están cada vez máis presentes na nosa contorna, en lugares de alto valor natural, polo que se precisa frear a súa rápida expansión”, afirma o persoal técnico do departamento.

O programa de actividades levouse a cabo en varias xornadas: unha primeira de parte teórica consistente nunha charla-coloquio mediante a que se fixo unha pequena introdución a estas especies invasoras, as consecuencias e posíbeis solucións desta problemática; e unha saída para coñecer e forma práctica como se debe facer a retirada e unha práctica de mostraxe para coñecer a superficie na que se atopa a especie e elaborar un plan de control da mesma.

A segunda parte do programa consistiu na retirada de “uña de gato” no esteiro do río Coroño. O alumnado realizou un total de tres saídas para a eliminación de Carpobrotus edulis. O resultado das tres xornadas foi a retirada de 1.051 kg desta especie invasora que se atopaba na desembocadura do río.

O obxectivo do Concello de Boiro é continuar con este tipo de actuacións a longo prazo, revisando as zonas de actuación e facendo un seguimento para controlar os posíbeis rebrotes; así como levando a cabo actividades formativas e divulgativas cos centros de ensino que permitan ao alumnado coñecer mellor o noso medio e saber como coidalo.