A boirense Diana Sieira leva á súa terra o monólogo “Conexións có(s)micas”

Boiro ten unha cita este sábado coa actriz, humorista e narradora Diana Sieira. Será na Casa da Cultura, baixo o título Conexións có(s)micas, o día 19 a partir das 21.00 horas. Podemos adquirir a nosa entrada o mesmo día da función a partir das 20.00 horas.

Conexións Có(s)micas é un espectáculo que en palabras da súa autora “xunta premisas que non se conectarían en ningún outro cerebro”. Por exemplo Gayoso e Madonna, a marca Benetton e o Carnaval en Cabo de Cruz, a transcendencia e os cereais chocapics. A función achega aproximadamente unha hora de humor absurdo onde non faltan referencias á vida cotiá, e, por suposto, ao concello da que é natural a actriz e monologuista (amais de actriz e artista de circo): Boiro.